Khaipi(Thuklai) na Zo kam-English Dictionary App vawt

Germany ngam ah pilna sin ahi Pa Thang Cin Dal (Thuklai) le Nu Niang Khan Huai ii tapa, Tg. Tual Khan Khai (Thomas Khaipi) na Android phone sung zak thei tu English pan Zo kam nam 3 dictionary app khat vawt aa, Android phone nei theampo na manh piak kul ngawl in download vawt thei ci in Chinworld Media te na son hi.

Ama sia Germany ngam Applied Science University, Hamburg ah Computer Science a sin saangpatang khat hi aa, Software Engineer a seam khat hi. Ama vawt Android app sia Zodict ci in min vaw aa, Android OS Version 2.2x Foryo (API level 8) pan kipan a khaak bel suak ahi Android 4.2 Jelly Bean (APL Level 17) ciang a zangh phone theampo sung ki zangh thei ci hi.

Hi Android app a vawtna ii a ngiimna sia Chin state, Zomi le Zo kam te a bo thathong ngawl natu hi aa, a mission sia (1) Zo kam ol tak sin thei natu (2) Zomi te ki laklaw, ih kam ih ki sin sak thei natu (3) Zo mi te ih kam ih zaatak, ih pau nop natu, Zomi te kilaklaw minamdang kam zangh ngawl in thu ih son thei natu – ci teng hi.

A app sung ah Lai Zo (Falam) kam, Halkha kam le Tedim kam ki hel hi. Lai Zo kam sia Sya Van Kyi ii vawt English-Chin Dictionary la in zangh aa, belap tu akisamh teng Global Falam Youth Organization (GFYO) te na hu hi. Halkha kam sia Dr. Van Bik ii vawt ahi English-Chin Dictionary la in zangh aa, Tedim kam sia Zomi Christian Literature Society (ZCLS) ii vawt dictionary sia zangh hi.

Zo kam dang ahi, Asho, Cho, Mizo, Kuki, Khumi le Zo kam dang tatuam te ii dictionary te zong ka belap nuam lai aa, ka zon saan hi. Zo kam dang dictionary vawt sa a om theampo ka welcome hi ci in Khaipi na son hi.

Android phone ahi ngawl, Iphone, Blackberry phone, Window Mobile phone zangh te ii zak thei tu zong ka vawt nuam hi, ahihang sum tam mama bo tu aa, hun zong tam mama zak kul tu ahikom haksa mama hi ci in Khaipi na son hi.

http://www.zodictinary.com zong Khaipi ii vawt hi aa, 2007 kum in a vawt hi. Tu a vawt Google Android App sia January 15, 2013 ni pan kipan ki zangh thei aa, a vawt zawk nipi 2 sung mihing 3600 na download zo ci in Chin WorldMedia te na son hi. Android phone pan download a vawt nuam po, Google Play pan ki download thei aa, zonna (search) Chin Zomi Dictionary ahi buale Laizo Falam Dictionary ci in ki zong thei hi. Computer taw website pan a en nuam te http://www.androidpit.com/en/android/market/apps/app/com.kp.zodic/English-Myanmar-Dictionary pan ki en thei hi.

Doppha: Chinworld Media

Posted in: Siyin News