Pumva Khua Thu

 Pumva khua mun sia Thuklai khua pan Aisan lo a thaw lai in a laisaan belna mun hi a, tua mun sia khua sat maa in ciknawng, pumpa bebek pona mun khat ahi hi. A masa in Pumpa a kici na pan Pumva suak hi kici hi. Pumva khua sia Thuklai teang te ii AD 1800 pawlin a sat khua hi a, ahizong cidam thei ngawl na hangin hun khat ciang Thuklai khua ah kingawm kik ngei hi. Khat vei ciang pawlkhat in Pumva khua ah teang kik a, mun dang Seak, Phaipi, Ngalmual cina munte ah zongh a teang om hi.

Pumva sia, a bulia na mun ahikom Mikaangte uk hun sung Mikaang kumpi do kik natu kikupna mun in kinei hi. 9 Oct. 1892 ni Sizang le Sukte kipawl in Mikaang kumpi naseam Myo uk pa le a naseam pawlkhat a kisuam ciang, ngal vaihawm na mun Pumva khua Mikaangte in sim thamh in haltum hi.

A tung a thu teng a pian zawk kum 30 hun, 1922 kum ciang Pumva khua kisat kik a, tu dong in kip suak hi.

Pumva khua ah 1959 kum in mawtaw theng hi. 1957 kum in Thuklai taw telephone khau kithung a, Sizang sung telephone taw kipaupui thei hi. 1983 kum ciang Kumpi te in Basic Education Primary School nga sak hi. UNDP te ii huu na hangin 2001 kum in thingno ciinna huan kivawt a, 2002 kum ciang tuimei Hydro Power de thei uh hi.

Biakna taw kisai in khua sat masak pan kipan Lawki ngeina kibia hi. 1922 kum ciang Tuiphum Tapidaw biakna theng a, 1979 ciang Lawki bo thiang in khuathing in Tapidaw suak siat uh hi.

Posted in: Tangthu(sizang)