Voklaak Khua Thu

 Mikaang ngamkeaute Sizang kual hong thet hun in Buanman te Taitan le Ngalpi khua ah kiteang siat hi. Tua hunin Mikaang ngal nan natu Kim Lai tuu te in Siallum (New Tartan) sat a, kulh nasia takin to hi. 7 May 1889 ni in Mikaangte in Siallum simtham a, a suakta lai teng in Ngalpi beal hi. 1892 kum ciang Ngalpi le Taitan kingawm in Voklaak khua sat hi.

Voklaak khua min pianna sia Buanman panin ngal le sa hangin Siallum ah a ki om pak hi a, tu a Voklaak khua mun sia khia la, vawk la ahikom “Vawklaakna mun” “Vawkla” cina pan a khak sang ciang “Voklaak” kici hi ci uh hi.

Pawlkhat leleau in Voklaak khua pianna hi bangin son hi. Sote phat lai in Sote ngam hi a, ni khat Sote in vok khat taisua a, dui sung ah tai in bo hi. Khatvei ciang tua vok sia tu a Voklaak khua mawk Saibual lu liangnuai ah mu kik a, a vok la in cia pui kik hi. Tua mun sia “Vok laak kikna” kici a, a ngei ciang Voklaak kici ahi hi. Tua mun ah khua a kisat ciang khua min a dang phuak ngawlin “Voklaak” kici paih ci hi.

Khua min koi bangin hong piang hi kale tu ciangin Voklaak kici paisuak hi.

Voklaak khua ah 1964 kumin mawtaw theng hi. 1950 kum in Limkhai Bungh taw telephone khau kithung a, Bungh, Buanman, Thuklai khuate kipaupui thei hi.1965 kumin kumpite in Siallum kulh puakikhi. 1985 kumin Sub-Rural Health Center nga hi. 2001 kumin UNDP in tui laak sak hi. 2009 kum ciang UNDP in tui, Sang Inn, le Doailui lei hong vawtsak hi.1928 kum in kumpi te in Basic Education Primary School nga sak a, 2003 ciang (မူလြန္ Mu-lun) ngato hi.

Biakna taw kisai in khua sat pan kipan Lawki ngeina kibia hi. 1912 kum ciang Tuiphum Tapidaw biakna om hi. 1961 kum ciang SDA biakna om thua hi. 1999 kum ciang A.G. biakna om thua hi.

Posted in: Tangthu(sizang)