Dr. Cope Suan Pau taw thusonna

Post :-Thawngno

 Yonsei University, South Korea pan Doctor of Theology (ThD) a zo, Dr. Cope Suan Pau tung ah ama thu ahizong, a saanginn thu ahizong, mailam nasep natu tupna ngiimna te ahizong email kaki dokna teng hong suak sak ing. Topa Pathian na a tup a ngiim theampo ngual zawna hong piak sak ta hen.

Dokna: Korea pilna na sinna saanginn Yonsei University thu heak tu kilawm na sak papo nong son thei tu le?

1. Yonsei University sia, a min phuakdan hibang hi. Yonhi kici leimun, nidang kumpi huang palace mun lui [Yonhi Palace] hi a, zangtam tawmno le mual pum 2 tungah department 90 val om sanginn lian bel khat hi a, Korea ngam sung ah minthang bel saang khat hi. ‘SKY’ ci in sang minthang bel 3 om hi: S for Seoul National University (kumpi saang); K for Korea University; Y for Yonsei. Yonhi College huang sung ah Severance Hospital kikhin ciang [Severance kici American mihau khat ii sum piakna tawh zato lian bel le minthang bel kisa hi: dawl 24 pha a, a khuhum tung ah helicopter tuak thei in, VIP cina te helicopter veu tawh kipuak hi]. Severance min lona le zatak piakna in a min tamsak in ‘Se’ la in Yonhi laimal sung ah a ngawm ciang, Yonsei ci min phuak kik uh ahi hi.
2. 1885 kum in Presbyterian missionary Dr. Underwood in clinic le theology saang phuan masa a tuaksung pan dadam in saang minthang bel khat suak to ahi hi. Underwood ci ciang nidang laikhetna ‘typewriter’ Co. min ih he tek lai tu hi. Tua thiktawlai khetna vawtpa sia missionary pa in upa hi a, a naupa missionary sepna ah a u in sum le pai taw en hi. Underwood sia a be min family name ahi hi. Kum 125 anniversary 2010 pan kipan Underwood International College kiphuan a, scholarship om hi. English taw kisin hi.
3. Yonsei ii emblem sia mu-vanlai hi a, campus sung main gate pan tum to le’ang 100 meter khawng mun ah mu-vanlai thazaksa om limpui khat monument dawn ah ki mu thei hi. Tasia in saang patang theampo mu-vanlai bang thasan in, thahat sak tuam mama hi.
4. Campus sung suangtum, suangpheak tung ah John. 8:32 “You will know the truth and the truth will set you free.” laimal ki at hi. Saangpatang theampo in thuman thutak a mu, a heak tu deina ahi hi. Luce Chapel ci in [tu in Yonsei Univ. Church in a min laih zo] Univ. chapel khat nei a, biakpiakna om tawntung hi. Department sim ii Building theampo ah thungetna khan prayer room khat tek nei hi.
5. 5. Christian University khat ahi ban-ah, Korea ngam sung private saang a lian bel le minthang bel ahi hi. Academic Research vawtna ah minthang bel a, leitungbup top level ah kihel hi. “Servant Leadership, Innovation’ ci te bulphu hi.

Dokna: Doctorate degree taw kisai heak tu kilawm nasak thu papo nong son thei tu?

1. Doctorate nam ni leitung ah om hi: 700 degree le 800 degree ci in academic circle in ciamte hi. Doctor of Theology/Philosophy [ThD, PhD] sia a sang bel 800 degree ahi hi. [D.Min. D. Miss. etc. pawl sia 700 hi] Saang pawl khat in ThD a niam zaw in a koi ma zong om si hi. Yonsei saang in Theology department ni nei a, The United Graduate School of Theology le College of Theology a hi hi. UGST sia seminary hi a, PhD pia thei ngawl in ThD pia a, College of Theology in PhD pia hi. Laisinna sia combined in kisin khawm tek a, credit le course work kibang linlian in ki earn ahi hi. Kei Mission Studies majoring vawt kahi hi.
2. Ka doctoral dissertation sia tha 4 sung bekma [1 Sept - 31 Dec] at hi thong in-ah deiza in pawl cing diipdeap zo tak ngawl hi. Ka main argument sia ‘missionary translation’ theory ahi hi. Pathian thu sia Western Pathian’ thu hi tuan ngawl a, eima tanglai ih nei Pathian min ma taw biakna le tanglai upna ih nei sia tawma in, Christianity sung ah kalsuan ih hina, ka argue hi. Lam khat pan in, in other words, missionary te Khamtung Zo ngam hong thetma pek in Zomi te sung ah Pathian na om khol zo hi. Zomi te in ngeina sung upna nusia in biakna le upna dang khat a pom hi ngawl zaw a, ih ngeina sung upna ih nei sia ma taw Christian faith a pom thei ih hi zaw hi.

Dokna: Korea na om sung, saang na kaa sung family life koibang ahi le?

1. Seoul khua sia leitung nuntak natu manh aham bel khua khat hi a, sum zakna ngongh thei mama thong hi. Sponsorship kician ngawl khawng taw om zawk tu ol ngawl hi. Kei ka saang pan special full scholarship plus stipend for living cost om ban-ah, pawlpi khat beal in ka zi [Neam Khan Cing] taw om thei kahi hi.
2. Ka tanu Esther Pau Sann Cing sia Ewha Womans University [American mission saang 1886 kum in numei missionary Scranton in a kipat ahi hi] ah BA program International Studies sin a, SAMSUNG company in full scholarship plus stipend and dormitory with food coupon hong sik diipdeap ahi hi.

Dokna: Korea na pai ma na life pawl khat nong son thei tu? lai at thei ci in kong zaakna om ve, ahi le?

Korea ka pai ma sia 1991-2000 Decade of Harvest AG mission nasepna ah kum 10 sung ki-apna tawh Mandalay khua ah om ing. 2001 ciang ngamdang pai nopna hang in Yangon tuaksuk: 2003 kum Haggai Institute, Singapore; 2005 Yonsei Univ. Th.M. program; 2009 in Yonsei ma ah ThD Samae special doctoral program ci in full scholarship ma taw doctor program vawt ka hi hi.

Yangon ka om sung translation ka seam a, shadow writer ka hi hi. Kei min dawk ngawl a ngual dang in a ma te’ min tawh veu published uh hi. Laibu a lian a no 25-30 bang pha tu ka um hi. Christian biakna lai veu ahi hi.

Dokna: Cia kik le te bang vawt sawm ni? Future planing?

Ciakik le’ng ka sepnop tam peuma hi: teaching, preaching, church planting, translating, printing, etc. Sum le paii thangui kisam vive hi a big challenge pui ahi hi.

Dokna: Na saang ka sung haksatna tam mama zong kaantan nanak tu um ing. Mipui te tung ah bang son nop na nei tu le?

1. Language barrier sia ngamdangmi te atu haksatna lian bel khat ahi tawntung hi. Eipawl zong sia ngamdang pai a te kam language sin meal ngawl veu kipai vahai thong a, ih ki cin ngawlna lian bel khat ahi hi.
2.  Yonsei saang zong Korean : English = 70% : 30% hi thong hi. Class a tam zaw sia Korean lecture veu ngai kul thong hial a thulo mama hi. A mamaw kitang hi. Ih paina tu ngam ii kampau le lai sia ih paima veu tawm beak ih sin khol tu, hi thei le a thiamsa in ih pai tu kisam hi.
3.  Haksatna kantanna thuku in Pathian muanna ma ahi hi. Lawm pha nei tu thupi hi. Lawm le ngual pha ih man thei bua le ngim ngana le lungmanna tam thei mama hi. Ka no lai pan kipan ka saang ka ciang nambat khat ka zon masak bel sia lawm pha khat veu ahi tawntung luilam hi. Tu dong ma in lawm pha khat veu ka man hamtang hi. “Nang sia ka angel ‘vantung lalaang’ nahi hi, ci veu in ka pok bul a, amate zong hong hu tu thalawp tuam valuan phet uh hi.

Tua hi a, ngualzawhna sia Pathian kung pan hong pai ci in ka um hi. Ei ma sang pan in citakna, hitintenna diligent tu le nungkin ngeingawl perseverance nei tu thupi bel tu hi. Mungtup vision le goal setting kician nei tu kisam hi. Long range, short range ngealkholna nei tu kisam hi. Leitung group kipawlna, ngam vaihawmna, etc. te in kum 20 long range plan veu nei a, kum 5 short range plan veu taw na seam hi. Ei zong mimal kalsuanna ah tubang ma nei tu kisam kasa hi.

Khangthakte in laisim, pilna/thiamna thupisak masak tu kisam kasa hi. Dollar masak kalsuanna in minam kiallap hong khangto sak tu bang khat ahihang, long range khantona tu ciang in pilna academic/profession ma hong thupi tu hi. Minam/ ngam/ saang khat ii khantona standard le level sia scholar bangza om, scholarly contribution bangza nei ci tung ah ki en ahi hi.

Tua hi a, a tawpna ah Sizang mi sung scholar ih tam tu thupi tu hi. Scholar ci ciang doctor degree holder cinopna hi ngawl a, scholarly nasepna te cinopna ahizaw hi. Mi tampitak te in degree nga zawk ciang, aman kisa in, bangma seam thua nawn ngawl a, tu te sia scholar kici thei ngawl a, degree holder bekma ahi uh hi. Sizang mi sung ah degree holder bangza om cisia sang, scholar bangza om cisia hong thupi tu ahi hi. Degree holder khat in a pilna/thiamna tungtawn in mihing te a tu scholarly contribution a nei zo nawn bua le ama sia scholarly dead, thi zo ahi ta a, degree holder bekma ahi lai hi.

Posted in: Article( Siyin)